Улаанбаатар хот, Монгол Улс — 2025 оны 6-р сарын 5. Олон Улсын Санхүүгийн Корпораци (ОУСК) болон Монгол Улсын Санхүүгийн Зохицуулах Хороо (СЗХ) нь Монгол Улсад тогтвортой санхүүгийн тогтолцоог улам сайжруулах зорилгоор Хамтын ажиллагааны санамж бичигт гарын үсэг зурж, хамтын ажиллагаагаа шинэ түвшинд хүргэлээ. Энэхүү Санамж бичгээр ОУСК-ийн “Ногоон санхүүгийн зах зээлийг хөгжүүлэх” төслийн хоёрдугаар үе шат албан ёсоор эхэлж буйг мөн баталгаажуулж байна.
Монгол Улс ногоон санхүүгийн тогтолцоог хөгжүүлэх чиглэлээр тодорхой амжилтууд гаргасаар байна. 2021 онд Япон Улсын Засгийн газрын дэмжлэгтэйгээр ОУСК нь Монгол Улсын ногоон бондын журам болон бонд гаргах гарын авлагыг боловсруулахад СЗХ-той хамтран ажилласан. Үүний үр дүнд дотоодын болон олон улсын зах зээлд долоон удаагийн ногоон болон нийгмийн бондын арилжаа амжилттай хийгдэж, хувийн хэвшлийн аж ахуйн нэгжүүд нийт 338 сая ам. долларын хөрөнгө босгож чадсан юм. 2022 онд ОУСК нь бусад гол оролцогч талуудтай хамтран Монголын хөрөнгийн биржид бүртгэлтэй компаниудад зориулан Байгаль орчин, нийгэм, засаглал (БОНЗ) болон тогтвортой байдлын тайлагналын гарын авлагыг боловсруулахад СЗХ-д дэмжлэг үзүүлсэн. Уг баримт бичиг нь олон улсын шилдэг туршлага болон ОУСК-ийн Ил тод байдал, мэдээлэл тайлагналын зөвлөмжийг ашиглан боловсруулагдсан болно. 2023 онд СЗХ нь ОУСК-ийн дэмжлэгтэйгээр үйл ажиллагаа явуулдаг Тогтвортой банк, санхүүгийн олон улсын сүлжээ (Sustainable Banking and Finance Network, SBFN)-ний гишүүнээр элссэн нь тогтвортой санхүүгийн олон улсын хамтын ажиллагаанд Монгол Улсын оролцоог бэхжүүлэх чухал алхам болсон юм.
Санамж бичгийн хүрээнд талууд хөх бонд, тогтвортой байдалтай холбоотой бонд, тогтвортой бонд зэрэг шинэлэг сэдэвчилсэн санхүүгийн хэрэгсүүдийн зохицуулалтын орчныг бүрдүүлэх чиглэлээр хамтран ажиллана. Мөн БОНЗ болон тогтвортой байдлын тайлагналын гарын авлагыг Олон улсын санхүүгийн тайлагналын стандартын (IFRS) Тогтвортой байдлын стандарт 1 болон 2-т заасан удирдамжтай нийцүүлэх ажлыг эхлүүлэхээр төлөвлөж байна.
“Энэхүү төсөл нь Монголын аж ахуйн нэгж, байгууллагуудад ногоон бондоос гадна уур амьсгалын сэдэвт бусад шинэлэг санхүүгийн хэрэгслийг ашиглан хөрөнгө татах боломжийг нэмэгдүүлж, санхүүжилтийн эх үүсвэрийг төрөлжүүлэх, мөн энэ чиглэлийн төслүүд болон бизнесийн үйл ажиллагаанд илүү их хэмжээний хөрөнгө оруулалт татах нөхцөлийг бүрдүүлнэ. ОУСК-тай хамтран ажилласнаар бид олон улсын стандартад нийцсэн, илүү уян хатан, байгаль орчинд ээлтэй санхүүгийн тогтолцоог хөгжүүлж, манай улсын эдийн засгийн тогтвортой хөгжилд бодит хувь нэмэр оруулна” хэмээн СЗХ-ны Дарга Т.Жамбаажамц онцлон тэмдэглэв.
ОУСК-ийн Монгол Улс дахь Суурин төлөөлөгч Маттье Лө Блан хэлэхдээ: “Тогтвортой хөгжлийн зорилтуудыг хэрэгжүүлэхэд чиглэсэн Монгол Улсын хүчин чармайлт нь дэд бүтэц, хөдөө аж ахуй, ойн аж ахуй зэрэг салбаруудад хөрөнгө оруулалт хийх асар их боломжийг нээж байна. Энэ нь ажлын байр нэмэгдүүлэх, инновацийг дэмжих, эдийн засгийн хүртээмжтэй өсөлтийг хангахад чухал үүрэг гүйцэтгэх юм. Ийм төрлийн хөрөнгө оруулалт нь барилга, засвар үйлчилгээний салбаруудаас авахуулаад цэвэр технологийн гарааны бизнес, бусад эдийн засгийн салбаруудад ажлын байр бий болгож, шинэ салбаруудыг хөгжүүлэх өргөн боломжийг бүрдүүлнэ. Бид эдгээр боломжийг бодит ажил хэрэг болгохын тулд хувийн хэвшлийн шийдлүүдийг үр дүнтэй ашиглахын зэрэгцээ өөрсдийн мэдлэг, туршлага, нөөц бололцоог дайчлан тууштай дэмжлэг үзүүлж ажиллах болно” хэмээн онцоллоо.
Сүүлийн арван жилийн хугацаанд ОУСК нь Монгол Улсад тогтвортой санхүүгийн тогтолцоог хөгжүүлэхэд тууштай дэмжлэг үзүүлж, гол оролцогч талуудтай үр дүнтэй хамтран ажилласаар ирсэн. “Ногоон санхүүгийн зах зээлийг хөгжүүлэх” төслийн эхний үе шатны хүрээнд ОУСК нь Монгол Улсын банкны салбарын уур амьсгалын өөрчлөлтөөс үүдэлтэй эрсдэлийн өртөмтгий байдлыг цогцоор нь үнэлсэн. Улмаар 2023 болон 2024 онуудад ОУСК нь Монгол Улсад анх удаа ногоон бонд болон нийгмийн бондод хөрөнгө оруулалт хийж, тогтвортой санхүүгийн бондын зах зээлийг хөгжүүлэхэд бодитой хувь нэмэр оруулсан юм.
ОУСК-ийн тухай
ОУСК нь Дэлхийн Банкны бүлгийн гишүүн бөгөөд хөгжиж буй орнуудад хувийн хэвшлийг дэмжихэд чиглэсэн дэлхийн хамгийн том хөгжлийн байгууллага юм. Бид дэлхийн 100 гаруй улсад үйл ажиллагаа явуулж, зах зээлийг хөгжүүлэх, бизнесийн боломжийг өргөжүүлэх, тогтвортой эдийн засгийн өсөлтийг дэмжих зорилгоор өөрсдийн мэдлэг, туршлага, санхүүгийн нөөц бололцоог ашиглан хамтран ажилладаг. 2024 оны санхүүгийн жилийн хүрээнд ОУСК нь хөгжиж буй орнуудын хувийн хэвшлийн аж ахуйн нэгжүүдэд нийт 56 тэрбум ам. долларын хөрөнгө оруулалт хийж, ажлын байр бий болгох болон хөгжлийн тулгамдсан сорилтуудыг хувийн хэвшлийн оролцоогоор шийдвэрлэхэд онцгой анхаарч ажилласан.
Дэлгэрэнгүй мэдээллийг www.ifc.org цахим хуудаснаас үзнэ үү.
СЗХ-ны тухай
Санхүүгийн зохицуулах хороо (СЗХ) нь Монгол Улсын Их Хурлын дэргэдэх банк бус санхүүгийн салбарыг зохицуулах, хяналт тавих чиг үүрэгтэй бие даасан байгууллага юм.
СЗХ нь банкнаас бусад санхүүгийн байгууллагууд, даатгалын компаниуд болон зуучлагчид, үнэт цаасны компаниуд, хадгаламж зээлийн хоршоод, үл хөдлөх хөрөнгийн зуучлагч байгууллагууд, үнэт металл, үнэт чулууны арилжаа эрхлэгчид, виртуал хөрөнгийн үйлчилгээ үзүүлэгчид, мөнгөн зээлийн үйлчилгээ эрхлэгчид зэрэг өргөн хүрээний этгээдийн үйл ажиллагаанд хяналт, зохицуулалт хэрэгжүүлдэг. Хороо нь хуульд заасан бүрэн эрхийнхээ хүрээнд санхүүгийн зах зээлийн үйлчлүүлэгчид болох үнэт цаас эзэмшигчид, дотоодын болон гадаадын хөрөнгө оруулагчид, даатгуулагчдын эрх ашигт сөргөөр нөлөөлөх санхүүгийн зөрчил, хууль бус үйлдлээс урьдчилан сэргийлэх, холбогдох хууль, журам, зохицуулалтын хэрэгжилтийг хангах замаар тэдний эрх ашгийг хамгаалах үүрэгтэй.
Дэлгэрэнгүй мэдээллийг www.frc.mn цахим хуудаснаас үзнэ үү.
Contacts
Stay Informed
Sign up to have customizable news & updates sent to you.